Як прасбіт прытулку можа атрымаць медыцынскую або псіхалагічную дапамогу ў сітуацыі, калі ў яго няма медыцынскай страхоўкі? Хто цяпер дапаможа падрыхтаваць апеляцыю ў выпадку адмовы ў прытулку, калі бескаштоўны адвакат больш не прадастаўляецца? Дзе падчас чакання можна пачаць вывучаць літоўскую мову? Кампенсацыі за лекі, праезд у грамадскім транспарце, дзіцячы садок — усё гэта цяпер даступна для прасбітаў. Разбіраемся, на якіх умовах можна атрымаць такую падтрымку.
Прасбіты прытулку, апынуўшыся ў новай краіне, сутыкаюцца не толькі з юрыдычнымі бар’ерамі, але і з бытавымі цяжкасцямі. У Літве адной з нямногіх арганізацый, якія дапамагаюць ім адаптавацца, з’яўляецца Caritas. Што такое Caritas, на якія сацыяльныя групы скіраваная іх падтрымка і як арганізацыя дапамагае прасбітам прытулку? Размаўляем з Томасам Бакшысам, сацыяльным кансультантам Цэнтра інтэграцыі замежнікаў Caritas.
Змест выпуску:
Праект Caritas па падтрымцы прасбітаў прытулку дзейнічае па ўсёй Літве да канца 2025 года. Таму варта паспяшацца, каб скарыстацца такой магчымасцю.
Дапамога існуе па наступных напрамках:
- Сацыяльныя кансультацыі
- Кансультацыі псіхолага
- Кансультацыі юрыста (калі вам адмовілі ў бескаштоўнай юрыдычнай дапамозе пры апеляцыйнай скарзе, вы таксама маеце магчымасць звярнуцца па дапамогу)
- Урокі літоўскай мовы для пачатковага ўзроўню (3 месяцы, анлайн, 2 разы на тыдзень)
- Пасярэдніцтва пры атрыманні медыцынскай дапамогі (кампенсацыі за аналізы, кансультацыі, слыхавыя апараты, акуляры і інш.)
- Аднаразовыя кампенсацыі на праязны білет у грамадскім транспарце (цяпер на 3 месяцы, але пасля ліпеня з-за падаражання будзе толькі на 2 месяцы) і на дашкольную адукацыю (1 месяц)
- Сацыякультурная занятасць
- Дапамога валанцёраў
Для ўсіх кампенсацый варта мець квіт (або выпіс з банка), рахунак-фактуру на вашае імя, а калі гаворка ідзе пра медыцынскую дапамогу — рэцэпт або прызначэнне ад лекара.
Кантакты:
Tomas Bakšys – сацыяльны кансультант Цэнтра інтэграцыі замежнікаў Caritas
Тэл: +370 68450803
Email: tomas.baksys@vilnius.caritas.lt
Сайт Caritas: https://www.caritas.lt/
Для тых, хто жадае прыняць удзел у падкасце «Лёгка сказаць» у якасці госця альбо запытаць нас, мы прапануем ананімна запоўніць форму зваротнай сувязі: https://forms.office.com/r/R6zVM97JfP
Калі Вы жадаеце прыняць удзел у запісы, гэта магчыма для тых, хто знаходзіцца ў Вільні, з-за таго што мы запісваем падкаст тут. Калі Вы не з Вільні, але хацелі б падзяліцца сваёй гісторыяй, мы можам пераказаць яе ў падкасце за Вас. У такім выпадку націсніце «Ёсць пытанне/прапанова або жадаеце паведаміць інфармацыю» у другім пытанні формы і распавядзіце Вашую гісторыю як мага больш падрабязней, каб гэта дапамагло іншым уцекачам ці просьбітам прытулку, якія сутыкнуліся з аналагічнай праблемай і яшчэ не вырашылі яе.
Калі вы жадаеце з намі звязацца, але баіцеся выкарыстоўваць каментары, прапануем напісаць нам на e-mail. Пасля гэтага дастаткова будзе выдаліць свой ліст з папкі «Адпраўленыя».
Наш адрас: help@belarus.fm
